Аввалроқ Арсен Венгер қоидага ўзгартириш киритишни таклиф қилган эди.

Европа футбол ассоциациялари иттифоқи (УЕФА) офсайд қоидасини ўзгартириш таклифини қўллаб-қувватламади. Бу ҳақда The Times нашри хабар берди.

Бунгача Халқаро футбол ассоциациялари кенгаши (IFAB) 20 январ куни офсайд қоидасини ўзгартириш масаласини муҳокама қилиши айтилган эди.

Айни пайтда амалдаги қоидага кўра, ҳужумчи футболчининг гол уриш мумкин бўлган танасининг исталган қисми узатма пайтида рақибнинг сўнгги ҳимоячисидан олдин жойлашган бўлса, офсайд қайд этилади. Бундан олдин «Арсенал» собиқ бош мураббийи, ҳозирда ФИФАнинг футболни глобал ривожлантириш бўлими раҳбари бўлган Арсен Венгер қоидага ўзгартириш киритишни таклиф қилган эди.

Унинг фикрича, агар гол уриш мумкин бўлган тананинг исталган қисми сўнгги ҳимоячи билан бир чизиқда ёки ундан орқада жойлашган бўлса, футболчи офсайд ҳолатида ҳисобланмаслиги керак.