Наманганда футбол ишқибозлари учун катта байрам: «Навбаҳор» футбол жамоасининг янги мавсумдаги таркиби таништирилди.
Наманган шаҳридаги «Паҳлавон» спорт мажмуасида “Навбаҳор” профессионал футбол клубининг 2026 йилги мамлакат чемпионати олдидан тақдимот маросими бўлиб ўтди.
Тадбирда Наманган вилояти ҳокими Шавкатжон Абдураззоқов сўзга чиқиб, футболчилар, мураббийлар штаби ва барча мухлисларни яқин кунларда бошланадиган янги мавсум билан табриклади. “Навбаҳор” жамоасига улкан муваффақиятлар, омад ва зафарлар тилади.
Таъкидлаш лозим, Тимур Кападзе бош мураббий этиб тайинланган “Навбаҳор” ПФК янги мавсумда ўз олдига катта мақсадларни қўйган. Жамоа таркиби мавсум олдидан деярли янгиланди. Жамоага 15 нафар тажрибали янги футболчи қабул қилинди.
Улар орасида Ўзбекистон миллий терма жамоасининг жаҳон чемпионати йўлланмасини қўлга киритишига муносиб ҳисса қўшган Ўткир Юсупов, шунингдек, Россия ва Грузия, Бразилия чемпионатларида тўп суриб, катта тажриба орттирган футболчилар бор.
Футбол шоусига айланган тадбир давомида янги футболчиларга спорт формалари ва рақамлари тантанали равишда топширилди. Мухлисларнинг соғинчи, футболчиларнинг ғалабага бўлган иштиёқи тадбирга ўзига хос байрамона руҳ бағишлади.
Тадбирда жамоа сардори Ўткир Юсупов сўз олиб, юқори ўринларни эгаллаш ва мухлислар ишончини оқлаш учун жамоанинг ҳар бир аъзоси бор имкониятларини ишга солишини билдирди.
Клуб бош мураббийи Тимур Кападзе вилоят ҳокимига жамоанинг махсус либосини топширди.
Тимур Кападзе бошчилигидаги “Лочинлар” жамоаси 2026 йилда мамлакат чемпиони бўлишни ўз олдига мақсад қилган.
Омад Сенга, «Навбаҳор»!
Наманган вилояти ҳокимлиги Ахборот хизмати.
__
Namanganda futbol ishqibozlari uchun katta bayram: «Navbahor» futbol jamoasining yangi mavsumdagi tarkibi tanishtirildi.
Namangan shahridagi «Pahlavon» sport majmuasida “Navbahor” professional futbol klubining 2026-yilgi mamlakat chempionati oldidan taqdimot marosimi boʻlib oʻtdi.
Tadbirda Namangan viloyati hokimi Shavkatjon Abdurazzoqov soʻzga chiqib, futbolchilar, murabbiylar shtabi va barcha muxlislarni yaqin kunlarda boshlanadigan yangi mavsum bilan tabrikladi. “Navbahor” jamoasiga ulkan muvaffaqiyatlar, omad va zafarlar tiladi.
Taʼkidlash lozim, Timur Kapadze bosh murabbiy etib tayinlangan “Navbahor” PFK yangi mavsumda oʻz oldiga katta maqsadlarni qoʻygan. Jamoa tarkibi mavsum oldidan deyarli yangilandi. Jamoaga 15 nafar tajribali yangi futbolchi qabul qilindi.
Ular orasida Oʻzbekiston milliy terma jamoasining jahon chempionati yoʻllanmasini qoʻlga kiritishiga munosib hissa qoʻshgan Oʻtkir Yusupov, shuningdek, Rossiya va Gruziya, Braziliya chempionatlarida toʻp surib, katta tajriba orttirgan futbolchilar bor.
Futbol shousiga aylangan tadbir davomida yangi futbolchilarga sport formalari va raqamlari tantanali ravishda topshirildi. Muxlislarning sogʻinchi, futbolchilarning gʻalabaga boʻlgan ishtiyoqi tadbirga oʻziga xos bayramona ruh bagʻishladi.
Tadbirda jamoa sardori Oʻtkir Yusupov soʻz olib, yuqori oʻrinlarni egallash va muxlislar ishonchini oqlash uchun jamoaning har bir aʼzosi bor imkoniyatlarini ishga solishini bildirdi.
Klub bosh murabbiyi Timur Kapadze viloyat hokimiga jamoaning maxsus libosini topshirdi.
Timur Kapadze boshchiligidagi “Lochinlar” jamoasi 2026 yilda mamlakat chempioni boʻlishni oʻz oldiga maqsad qilgan.
Omad Senga, «Navbahor»!
Namangan viloyati hokimligi Axborot xizmati.