«Бутун дунёдаги мухлислар учун шундай қилдим» — Мане жамоасини майдонга қайтаргани ҳақида
Сенегал сардори ҳакамнинг қароридан норози бўлиб, кийиниш хонасига йўл олган жамоадошларини ортга қайтаргани сабабини айтди.
Сенегал миллий жамоаси ва «Ан Наср» клуби ҳужумчиси Садио Мане Марокашга (1:0) қарши Африка Миллатлар кубоги финалидаги можаро ҳақида фикр билдирди.
Финалнинг 90+9-дақиқасида Сенегал дарвозасига пеналти белгиланганидан сўнг бош мураббий Пап Тиав жамоани майдондан олиб чиқиб кетди, Мане эса футболчиларни майдонга қайтарди.
«Ҳакамлар ҳам хато қилиши мумкин, уларни айблаш адолатсизлик бўлади. Энг муҳими, мен бу ишни бутун дунёдаги мухлислар учун қилдим — улар ўйинни охиригача томоша қилишни хоҳлашган», — дея Маненинг сўзларини келтиради Тhe Touchline.
Сенегалга ғалабани қўшимча вақтда Папа Гуйе урган гол келтирди. Жамоа ўз тарихида иккинчи марта Африка Миллатлар кубоги ғолибига айланди.